حلم غريب

موضوع: حلم غريب الثلاثاء أغسطس 10, 2010 12:07 pm

احترت كتير فى تسميه الموضوع ده
فهل من الأفضل انى اقول حلم غريب ولا حلم سريع افضل ، وملقتش الا انى اسميه حلم غريب ، لانه فعلا حلم غريب ، ولان سريع لا تشرح معنويات الحلم ، ويتلخص مضمونه فى الاتى :
" انك تحلم ان حبيبك او قريبك او صاحبك او صديقك بيشوفك بتغرق ، وميروحش يمدلك ايديه او يجيبك من الحاجه الى انتا بتغرق فيها دى ، حسب نوع الافلام الى انتا بتتفرج عليها ، فسواء كان الغريق فى ميه او فى نار او على رمال متحركه ، فأنت شوفت الحلم خلاص "
تخيل معايا كده
انا ليه مقولتش عدوك وقولت حبيبك او صديقك ؟
ببساطه لان العدو ده شئ متوقع منه ، لكن الصديق او الحبيب ( استحاله )
السؤال هنا .. هايكون ايه موقفك ساعتها لما تقوم بالنوم ؟
هاتشعر بالقلق من صاحبك ؟ ، ولا هاتشعر بالقلق على صاحبك ؟ ، ولا هاتشعر بالقلق على نفسك ؟
هايكون ده نابع من احساس داخلى جواك ان هو ممكن يسيبك فى اى لحظه ؟ ، ولا مجرد حلم عادى ؟
هاتخاف انه يتقال عليه خاين وغدار ؟ ، ولا هاتخاف انه يسيبك ؟
هاتستعيذ بالله ؟ ، ولا هاتقول - لا - انا كذا ميعملش كدا فيا ؟ ، وياترى هاتقوله ولا لا ؟
هاتتوقع الحكايه دى منه ؟ ، ولا هاتحاول تخلق المبررات الى تخليك تصدق ان هو ميعملش كده ؟
الاسئله كتيره ، طيب
معلش تخيل معايا كده تانى – مهو حلم بقى – ان الانسان ده هو الى حلم الحلم ده
تتوقع منه ايه ؟ هل هايجى يقولك ؟ ، ولا هايفوت الموضوع ولا كأن حاجه حصلت ؟
وهايكون موقفك ايه لو قالك ؟
هاتقوله – لا – انا معملش كده ؟ ، ولا هاتبصلو وتضحك ؟ ، ولا هاتخاف ان الزمن يعمل فيكوا كده بجد ؟ ، ولا مش هايكون للحلم اى تأثير عندك ؟
طيب ، بمناسبه التخيلات
تخيل ان الحلم ده اتحول لحقيقه ، وبقى واقع مرير ، ولقيت نفسك بتخون صاحبك – ايوه بتخون صاحبك – قبل ما هو يخونك ، او بمعنى اصح لقيته بيغرق قدامك ، هاتعمل ايه ساعتها ؟
هاتبصله وتضحك زى الحلم وتسيبه يغرق ؟ وياترى هو هايلحقك ولا هايعمل زيك ؟
ولا كل واحد هايروح يحاول يلحق التانى حتى ولو فيها موته ؟
الاجابه على السؤال ده مش دلوقتى .. اسمع للأخر ..
دلوقتى الموضوع بيختلف من شخص لشخص يعنى
القريب اسمه قريب ، فمن الطبيعى انه يحاول يلحقك ( يحاول ) مهو " الدم عمره ما يبقى ميه "
الحبيب هاينقذك بمقدار حبه ليك ، وبالتالى لو مش بيحبك اوى ، اقرا على نفسك الفاتحه
الاخ او الاخت فده عمره ما هايحصل وعلى رأى الست بوبى " احلم " وده غالبا بيكون بسبب نومك وانت زعلان من اخوك او هو زعلان منك ، فمن الطبيعى ان عقلك يصورلك الصوره دى
واخيرا الصديق ، وهنا بيظهر نوعين :
عشره العمر : وده بيكون تقديره ليك واجب
الصاحب ابن يومين : وده بيكون تقديره ليك عشان .......................
بيقولك " معرفه الرجال كنوز "
يمكن يكون ابن امبارح الى انا مصاحبه يطلع ارجل من عشره العمر
يبقى السؤال هنا مش انهى فيهم ؟
السؤال هنا ، مين الأرجل فيهم ؟
واجابه السؤال ده عندك انتا مش انا
بإختصار
" رسخ مبادئ الرجوله فى نفسك ، ومتحاولش تخون حد ، ومتفكرش انه ممكن يخونك ، حتى ولو خانك مره ، انته متعرفش ظروفه ساعتها كانت عامله ازاى ، ويابخت من بات مظلوم ولا باتش ظالم ، وسمعنى "
م الاخر " لا تجعل احدا خيارا اوليا فى حياتك اذا كنت انت خياراً ثانويا فى حياته "
وقت ضايع / صلاح غالى
اعداد وكتابه / امير الرومانسيه
سامى محمد صلاح الدين رفاعى

موضوع: رد: حلم غريب الخميس أغسطس 12, 2010 12:51 pm

احلى حاجه عجبتني في الموضوع ده هي جملة متفكرش انه ممكن يخونك

موضوع: رد: حلم غريب الجمعة أغسطس 13, 2010 2:37 pm

حاجات غريبه بتعجبك فى المواضيع

موضوع: رد: حلم غريب الخميس سبتمبر 16, 2010 10:26 am

جميل يا سمسم
Very Happy

موضوع: رد: حلم غريب السبت سبتمبر 18, 2010 4:54 am

اى خدمه ياسمسمه

موضوع: رد: حلم غريب الأحد أكتوبر 17, 2010 12:10 pm

نايس توبيك يا سمسم يلآ بقى فين النشاط الى فى المنتدى بتاع زمان قول للزمان ارجع يا زمان